FILLOI SEZONI TURISTIK NË ULQIN

[www.shqipnia.eu]

FILLOI SEZONI TURISTIK NË ULQIN

Arrijnë turistët e parë


Të gjithë në Ulqin janë në ankth për suksesin e këtij sezoni turistik gjë që është e natyrshme për një qytet që e ka të lidhur jetën dhe të ardhmen me zhvillimin e turizmit.

Pas ditëve me shi, ditët e mira me diell kanë sjellë turistët e parë në Ulqin. Dhe duket se ka qenë pikërisht koha e ndryshueshme që ka ndikuar në vonesën e ardhjes së turistëve të parë në krahasim me vitet e kaluara.
Fillimi i sezonit turistik nuk është edhe aq premtues edhe pse askush në Ulqin nuk e din numrin e saktë të turistëve që aktualisht pushojnë në këtë qytet. Përkundër premtimeve dhe besimit të zyrtarëve lokalë për suksesin e këtij sezoni, askush nuk mund të thotë me saktësi se çfarë do të jetë ai. Prandaj është edhe i kuptueshëm ankthi i qytetarëve të Ulqinit për suksesin e këtij sezoni duke ditur se kemi të bëjmë me një qytet që e ka të lidhur jetën dhe të ardhmen me zhvillimin e turizmit.
Ankthi i ulqinakëve lidhet edhe me ndikimet që do të kenë zhvillimet e përgjithshme botërore, si inflacioni në nivel botëror, rritja e çmimeve të shumë mallrave, në radhë të parë e naftës, por edhe faktorë të tjerë të karakterit vendor, si vendosja e pagesës së taksës ekologjike për të gjitha makinat që hyjnë në Mal të Zi.
Në aspektin e ofertës turistike sivjet nuk ka ndonjë ndryshim të madh. Për dallim nga viti i kaluar, në Ulqin është rritur numri i kapaciteteve në sektorin privat, kurse në sektorin hotelier mendohet që kapaciteti të jetë zvogëluar. Shumë hotele që dikur ishin simbol të turizmit të Ulqinit, sot ose nuk ekzistojnë ose nuk funksionojnë. Kështu për shembull, hoteli "Galeb" është prishur fare dhe sivjet nuk do të presë turistë.
Ndryshe nga kjo, plazhet e Ulqinit për çdo vit avancojnë në shërbimin e tyre. Këtë e dëshmon më së miri edhe numri i plazheve që janë bartëse të flamurit të kaltër, simbol i cilësisë së lartë.
Sa i përket çmimeve, nisur nga rritja e përgjithshme e të gjitha çmimeve dhe shërbimeve, çmimet e sivjetshme pritet të pësojnë rritje të vogël në krahasim me vitin e kaluar.
Përkundër problemeve të shumta, Ulqini ofron mundësi të shumta për tzu dëfryer dhe për të kaluar pushimet verore.
Gjithsesi, Ulqini e pret këtë sezon turistik në pritje të privatizimeve të mëdha që janë paralajmëruar të ndodhin në Plazhin e Madh, Ada dhe Valdanos.
_________________