NJË REFLEKSION MBI TRAGJEDINË E GËRDECIT

[www.shqipnia.eu]

NJË REFLEKSION MBI TRAGJEDINË E GËRDECIT

Fantazmat e historisë tragjike


Në këtë tragjedi të madhe është i tepërt çdo koment dhe tentim të tregohesh i mençur. Vetëm e di se edhe këtë herë është lajmëruar një ndjenjë e rëndë, sikur në kohën kur Shqipëria ishte i vetmi vend në Europë, plotësisht i izoluar nga Bota. Thjesht, paraqitet një ndjenjë intime se je i krijuar për diçka më të mirë se ajo që të kanë projektuar pushtetarët e dikurshëm komunist të shtetit tonë amë.
Fundjavën që shkoi, Shqipërinë e goditi një tragjedi e tmerrshme. Në serialin e shpërthimeve në depon e municionit në vendin Gërdec afër Tiranës, jetën e humbën pesëmbdhjetë vetë, ndërsa u lënduan gati treqind të tjerë. Janë rrënuar dhjetra shtëpia në rrethinë dhe është bërë evakuacioni i katër mijë njerëzve. Fuqia e shpërthimit ka qenë e tillë sa që është ndier në Maqedoninë fqinje. Fjala ishte për një depo të vjetër, nga vitet e gjashtëdhjeta, nga periudha e aleancave me Bashkimin Sovjetik dhe, më vonë, Kinën. Deri te shpërthimi erdhi gjatë procesit të demontimit. Lajmi ka qenë ndër të parët në të gjitha TV-të e botës. Për fat të keq!
Në këtë tragjedi të madhe është i tepërt çdo koment dhe tentim të tregohesh i mençur. Vetëm e di se edhe këtë herë është lajmëruar një ndjenjë e rëndë, sikur në kohën kur Shqipëria ishte i vetmi vend në Europë, plotësisht i izoluar nga Bota. Thjesht, paraqitet një ndjenjë intime se je i krijuar për diçka më të mirë se ajo që të kanë projektuar pushtetarët e dikurshëm komunist të shtetit tonë amë. Kur mendoj sot për periudhën komuniste nuk mund të mos mendoj se cilat mund të jenë arsyet që një etnos të mos shfaqë rezistencë për aq shumë decenie. Si ka ardhur deri te ajo që shpirti rebelues i këtij vendi (të jesh rebel është një nga vetitë e mrekullueshme, superiore, që e dallon njeriun nga delet), sepse - si tha një shkrimtar jugamerikan: "ato vetëm heshtin dhe kërkojnë bar dhe ujë".
Këto ditë u ngritën murgjit tibetanë në qytetin Lasa, kryeqyteti i Tibetit, shtet dhe popull të cilin Kina, jo vetëm që nuk e njeh, por edhe ushtron gjenocid kulturor. Kah fundi i vitit të kaluar, u ngritën, po ashtu, murgjit budistë, në Birmani. Marshi i murgjëve të bathur në sandale dhe të paarmatosur, është votuar si Pamje e Vitit në shumë TV botërore, në fund të vitit të shkuar. Ngjashëm po ndodh tani në Tibet, atë vend të madh, me një popull që nuk ka kurrfarë lidhjeje me kinezët, madje, as në rafshin e racës, edhe pse për ne të gjithë duken identikë. Është magjike kjo veti e budistëve tibetanë, në kundërshtim edhe me budizmin burimor, ashtu siç e ka formuluar Gautama Budha. Pse? Nga shkaku i thjeshtë se budizmi indus e ka hedhur tërë një nënkontinent, Indinë, në nirvanë kolektive.
Është një film francez, "Apartamenti". Flet mbi mosmarrëveshjen tragjike ku një djalë, (luan Vincente Kassel), dashurohet në një kalimtare të rastit, (luan Monica Bellucci), të cilën as nuk arrin ta shohë qartë. Më në fund, kur arrin tzi afrohet takimit zyrtar, bëhet një ndërrim tragjik i roleve dhe djali takohet me një tjetër femër, e cila vetëm në shikim të parë ia kujton të dashurën platonike, por, e cila është e shëmtuar si vetë djalli. Kuptohet, siç ndodhë në veprat "filozofike", e bukura përfundon tragjikisht, ndërsa, Kasselli ballafaqohet me versionin e shëmtuar. Sa herë që e shikoj këtë film, mbetet ndjenja se e bukura nuk ka shans në konflikt me të shëmtuarën.
Çfarë është lidhja e këtij filmi metafizik me realitetin e tragjedisë së Gërdecit? Edhe pse e Mira nuk ka shans të ngadhnjejë, madje as nuk ka hapësirë ta justifikojë vetën, ndoshta nuk është e pamundur që në jetë, të ndodhë e kundërta. Ndoshta, do të vijë koha kur lajmet sikur ky, që i takojnë epokës së të Keqes, do të deportohen në depon e hedhurinave të Historisë së kësaj pjese të Ballkanit.

Xhoana M. Perkaj
_________________

[www.shqipnia.eu]

TRAGJEDI NË FSHATIN GËRDEC TË VORËS

Shqipëria në Zi


Në tragjedinë që ndodhi të shtunën në fshatin Gërdec të Vorës, nga shpërthimi në një fabrikë të ngritur për çmontimin e municionit, deri tani kanë humbur jetën të paktën 16 persona, të paktën pesë të tjerë konsiderohen të humbur, ndërsa janë plagosur me dhjetra të tjerë.

Shqipëria është mbështjellur në zi pas tragjedisë që ndodhi të shtunën në fshatin Gërdec të Vorës, ku nga shpërthimi në një fabrikë të ngritur për çmontimin e municionit deri tani kanë humbur jetën të paktën 16 persona, të paktën pesë të tjerë konsiderohen të humbur, ndërsa janë plagosur me dhjetra të tjerë.
Përveç viktimave në persona janë shkaktuar edhe dëme të mëdha materiale, që sipas vlerësimeve paraprake llogariten në disa dhjetra milionë euro.
Me qindra persona kanë përfunduar në spitalet e ndryshme shqiptare, kurse ata që kanë pësuar lëndime më të rënda janë dërguar për t`u kuruar jashtë vendit, kryesisht në Itali dhe Greqi.
Tragjedia e Gërdecit ka shkaktuar dorëheqjen e ministrit të Mbrojtjes, Fatmir Mediu. Por opozita shqiptare ka kërkuar që të japë dorëheqje edhe kryeministri i Shqipërisë, Sali Berisha.
Prokuroria e Përgjithshme tashmë ka filluar hetimet lidhur me këtë rast dhe ka lëshuar fletëarrestet e para. Për momentin tre drejtues të përfshirë janë ndaluar. Bëhet fjalë për drejtorin e ndërmarrjes shetërore të import-exportit të armëve, administratorin e firmës shqiptare AlbDemil, Mihal Delijorgji, i arrestuar kater vite më parë për kontrabandë dhe evazion fiskal, si dhe drejtorin teknik të kësaj firme. Por mendohet se numri i të arrestuarve të përfshirë në këtë tragjedi do të rritet.
Akuza e parë është ajo e mosrespektimit të rregullave të trajtimit të materialeve plasëse, por mendohet se akuza të tjera mund t’i shtohen asaj. Dëshmitarë të ndryshëm kanë thënë se në fabrikë kanë punuar fëmijë të mitur dhe një numër i madh i femrave dhe se kushtet në fabrikë nuk i plotësonin parametrat për zhvillimin e këtij aktiviteti.
Qeveria shqiptare ka shpallur të martën ditë zie. Ajo ka premtuar se do të bëjë rimbursimin e të gjitha dëmeve të shkaktuara nga kjo tragjedi.
Shkaku i tragjedisë nuk dihet saktësisht ende. Edhe pse supozohet të ketë qenë faktori njerëzor, nuk përjashtohet mundësia e ndonjë akti terrorist.

Zyrtarët malazezë dhe partitë shqiptare shprehin ngushëllime

Zyrtarët më të lartë malazezë u kanë dërguar telegrame ngushëllimi homologëve të tyre shqiptarë me rastin e tragjedisë së Gërdecit.
Presidenti malazez Filip Vujanoviq i ka shprehur ngushëllime Presidentit shqiptar, Bamir Topi. Edhe kryeministri Millo Gjukanoviq i ka dërguar po ashtu telegram ngushëllimi homologut të tij shqiptar, Sali Berisha. Të dy ata kanë shprehur gatishmëri që Mali i Zi ta ndihmojë popullin shqiptar me ndihma mjekësore dhe ndihma të tjera të nevojshme.
Telegram ngushëllimi homologut të tij shqiptar i ka dërguar edhe ministri malazez i Mbrojtjes, Boro Vuçiniq.
Partitë politike shqiptare në Mal të Zi u kanë shprehur ngushëllime zyrtarëve më të lartë të Shqipërisë me rastin e tragjedisë së Gërdecit.
Në një telegram ngushëllimi dërguar Presidentit të Republikës së Shqipërisë, Bamir Topi, kryeministrit Sali Berisha dhe kryetares së Parlamentit, Jozefina Topalli, Lidhja Demokratike në Mal të Zi thekson se tragjedia në Gërdec na tronditi shumë dhe po e përjetojmë me dhimbje të madhe, por njëkohësisht edhe me shpresë që numri i viktimave në njerëz të jetë sa më i vogël.
LD në MZ u ka shprehur ngushëllime me këtë rast edhe të gjitha familjeve që kanë humbur të afërmit e tyre në këtë tragjedi kombëtare.
"Na jep forcë fakti se në çastet më kritike organet shtetërore, personeli mjekësor, policia, ushtria u angazhuan dhe po angazhohen me përkushtim për të shpëtuar të plagosurit e të lënduarit, në mënyrë që sadopak të zbuten pasojat e kësaj ndodhjeje me pasoja katastrofike. Me këtë rast përgëzojmë udhëheqësit qeveritarë dhe politikanët e të gjitha partive që sinqerisht u angazhuan dhe po angazhohen të përballojnë pasojat e kësaj tragjedie. Po ashtu përgëzojmë mjetet e informimit, të cilat në mënyrë korrekte, profesionale dhe me përkushtim përmbushën dhe po përmbushin detyrat e tyre në këtë mision kaq të domosdoshëm", thuhet ndër të tjera në telegramin e LD në MZ.
Kjo parti u ka bërë thirrje të gjithë politikanëve që këtë tragjedi njerëzore e kombëtare mos të mundohen ta shfrytëzojnë për përfitime politike, por që së bashku me të gjitha strukturat shtetërore të mundohen ta menaxhojnë situatën në mënyrë sa më efikase.
"Të ndihmohen në çdo pikëpamje ata që humbën më të dashurit. Të eleminohen pasojat dhe të fillojë rindërtimi shëndetësor dhe materialo-banesor, që sa më shpejt qytetarët që pësuan t`i kthehen jetës", thuhet në këtë telegram ngushëllimi të nënshkruar nga kryetari dhe deputeti i LD në MZ, Mehmet Bardhi.
Kryetari i Unionit Demokratik të Shqiptarëve, Ferhat Dinosha, i ka ngushëlluar po ashtu Kryetarin e Republikës së Shqipërisë, Bamir Topi, dhe kryeministrin Sali Berisha, me rastin e tragjedisë së Gërdecit.
Ai ka qenë në kontakte të vazhdueshme me Ambasadën e Republikës së Shqipërisë në Podgoricë dhe me zyrtarët e Malit të Zi, për të parë mundësinë e ndihmave nga ana e Malit të Zi për Shqipërinë në këtë fatkeqësi të madhe.
"Zyrtarët e Malit të Zi, sidomos Presidenti Vujanoviq, e kanë siguruar kryetarin e UDSH-së se Mali i Zi do të jetë i gatshëm të japë të gjitha ndihmat e mundshme për të lehtësuar sadopak pasojat e fatkeqësisë së përmendur", thuhet në kumtesë.
Edhe Partia e Prosperitetit Demokratik i ka dërguar telegrame ngushëllimi Presidentit të Shqipërisë, Bamir Topi, dhe kryeministrit Sali Berisha.
"Shpërthimet në Gërdec të Vorës janë me të vërtetë rrënqethëse, me përmasa tragjike dhe është vështirë të gjejmë fjalë për ngushëllime. Jemi tepër të prekur, në ankth dhe pritje në këto momente jashtëzakonisht tronditëse, por dhe shumë të dhimbshme. E ndajmë dhimbjen dhe lotët e hidhërimit me të afërmit e viktimave.", thuhet në telegramin e kryetarit të PPD-së, Amir Hollaj.
PPD shpreson që kjo tragjedi të mos marrë përmasa edhe më të mëdha.
"Jemi të sigurt që shteti shqiptar, Ju , qeveria, por dhe mbarë populli shqiptar kudo që ndodhet në botë, por edhe në Mal të Zi, do të dijë t`i përballojë këto sfida të vështira", thuhet ndër të tjera në telegramin e ngushëllimit.

I. Kallaba

_________________