PËR FLAMURIN

[www.shqipnia.eu]

PËR FLAMURIN

Tash kur na u imponua një flamur që nuk thot asgjë për përpjekjet e shqiptarëve për realizimin e aspiratës shekullore, i cili nuk thotë asgjë për përpjekjen e bërjes së Kosovës shtet, ne shqiptarëve na është dashur edhe pa më të voglin kundërshtim ta përqafonim një flamur me të cilin nuk na lidhë asgjë emocionalisht. Flamuri kuq e zi, do të mbetet si relikt për gjeneratat e reja, ai flamur për të cilin dhanë jetën shumë dëshmorë të kombit, nga fëmijët tanë, do të konsiderohet vetëm si një flamur i një shteti të "huaj". Për flamurin kuq e zi do të thuhet se është flamuri i Shqipërisë.

Flamuri i Kosovës do të jetë ky që aktualisht valon në krye të institucioneve tona dhe kjo është punë e kryer "për sot e shtatëqind të shtune" siç i thonë asaj fjalës, dhe dihet për këtë çështje është e kotë të diskutohet tani. Mirëpo, shpresojmë se Kosova tani e tutje do të funksionojë si shtet, bile si "shtet i pavarur", ngase kam përshtypjen se jemi hapur paksa dhe mund të na marrë shkuja.
Për Kohën Javore:
Ilir Sefaj

Po kalon edhe muaji i dytë që kur Kosova e mori statusin e shtetit të pavarur. Mirëpo, kam përshtypjen se do të kalojnë edhe shumë muaj e mbase edhe vite, e Kosova kurrsesi të funksionojë si shtet i pavarur. Kosovës, shkurt e shqip, shtet i thënçin, ngase Samarxhiq po hyn në Kosovë pa pyetur askënd hiç. Krahas kushtetutës e të tjera elementeve që i duhen një shteti për të funksionuar si i tillë, atij i nevojiten edhe simbolet, të cilat bëjnë që të dallohet njëri nga shteti tjetër. Gjithsesi nuk është vetëm kjo domethënia e simboleve. Simbolet e një shteti, zakonisht, në vete ngërthejnë aspekte të përpjekjeve të kombeve të caktuara deri te realizimi i aspiratës së tyre. Edhe shteti ynë i bëri simbolet me të cilat do të identifikohemi në botë, e kemi flamurin, stemën, kushtetutën. Himni do të kompozohet më vonë, se tek e fundit nuk na qenka edhe aq urgjente kjo punë!
Kur shqiptari më i ditur i shekullit tonë, i madhi Ibrahim Rugova, në mbledhje me personalitete të shquara të politikës ndërkombëtare, dhe jo vetëm të politikës, dilte me flamurin për të cilin mendonte se një ditë do të valonte në krye të institucioneve të shtetit të Kosovës, që aq shumë dha për të, disa pseudopatriotë e quanin me ironi "flamuri i Rugovës" dhe e digjnin rrugëve të kryeqytetit, duke pandehur se po bënin vepra të mëdha patriotike. Tash kur na u imponua një flamur që nuk thotë asgjë për përpjekjet e shqiptarëve për realizimin e aspiratës shekullore, i cili nuk thotë asgjë për përpjekjen e bërjes së Kosovës shtet, ne shqiptarëve na është dashur edhe pa më të voglin kundërshtim ta përqafonim një flamur me të cilin nuk na lidhë asgjë emocionalisht. Flamuri kuq e zi, do të mbetet si relikt për gjeneratat e reja, ai flamur për të cilin dhanë jetën shumë dëshmorë të kombit, nga fëmijët tanë, do të konsiderohet vetëm si një flamur i një shteti të "huaj", për flamurin kuq e zi do të thuhet se është flamuri i Shqipërisë. T`i marrim shembuj shtetet fqinje; ta zëmë në Maqedoni shqiptarët përbëjnë vetëm zyrtarisht mbi 25% të popullsisë së përgjithshme dhe deri vonë nuk kanë gëzuar as edhe të drejtat më elementare, përkundër të vërtetës se shqiptarët në Maqedoni janë komb shtetformues. Në Kosovë mbi 90% e popullsisë së përgjithshme janë shqiptarë etnik, po e theksoj shqiptarë etnik, dhe vetëm një përqindje e vogël e minoriteteve si: serbë, romë, turq, etj., që furtunat e ndryshme i kanë sjellë në këto anë, prap këta të fundit gëzojnë privilegje të pamerituara që janë në kundërshtim edhe me konventat ndërkombëtare. Bile çështja ka shkuar aq larg, sa që pjesë e identitetit të tyre të vendoset edhe në flamurin e shtetit të Kosovës. Sido që të jetë, flamuri i Kosovës do të jetë ky që aktualisht valon në krye të institucioneve tona dhe kjo është punë e kryer "për sot e shtatëqind të shtune" siç i thonë asaj fjalës, dhe dihet për këtë çështje është e kotë të diskutohet tani. Mirëpo, shpresojmë se Kosova tani e tutje do të funksionojë si shtet, bile si "shtet i pavarur", ngase kam përshtypjen se jemi hapur paksa dhe mund të na marrë shkuja. Mendoj se sfida e radhës janë zgjedhjet në serbi, ato nuk guxojnë kurrsesi të organizohen edhe në Kosovë. Po i themi vetes shtet, a po?!
_________________